Пичефксса лятфнемат (мокша)

1989-це кизоня аделавсь Афганистанца войнась. Тячи, даволковть 15-це шистонза, топодсть 35 кизот ся пингста, мзярда мастороньконь мекольце солдатонза ётазь афгано-советскяй границать. Тя тюремаса тяфта жа примасть участия и Мордовия аймаконь эряйхне. Сембоц республикастонк Афганистану кучсевсть колма тежятть ломань. 1979-це кизонь 25-це декабрьста сявомок 1989-це кизонь февральти самс, мзярс мольфтевсть тоса тюрематне, странастонк 546 255 солдат и офицер ульсть Афганистанонь модать лангса. Эряфонь аф ужяльдезь синь пяшкотькшнезь эсь воинскяй долгснон. 2 956 Мордовияса шачфсь примасть участия афганскяй событиятнень эса, няфнемок тюрематнень пингста аф пелема, героизма и оцю тонафнефши. 179-сь эздост казьфт орденца и медальса. Ужяленди, 69 од цёрась ашесть мрда меки шачема шири. Вов тяфтапт аф кенярфти цифратне. Ся пингонь 18 — 20 кизоса цёратненди тяни 60-ть малава. Синь ульсть аф весть ранендафт, арасть инвалидкс. Войнась лафчептезень шумбрашиснон, гастязе психолгияснон. Ламотне тянемс эряфса ашезь му эсь вастснон. Тянь ширде республикань инвалидонь общественнай организациясь максси оцю лезкс. Центрась кучсесыне инвалиттнень пчксема Московскяй области. Николай Русскин шачемас коре Рузаевскяй райононь Сузгярьге велень. Школать аделамда меле сон сярьгятьфоль армияв. Повсь служама Афганистану, ульсь сапёркс. Минь сюконятама ветераттнень инголе и марятама гордость синь инксост, кие кандозень эсь лангсонза ся войнань сембе стакатнен сталмотнен. Фалу мяляфтсайнек сятнень, кие ашесть мрда меки куду. Синь подвигсна, тяниень эряфонь ащемасна и пара тевсна арсихть примеркс оттненди.